प्रिय विद्यार्थी भाइबहिनीहरू,
तपाईंहरूलाई कक्षा १२ को परीक्षामा सफलतापूर्वक उत्तीर्ण गर्नुभएकोमा हार्दिक बधाई एवं आगामी यात्राको लागि अनन्त शुभकामना व्यक्त गर्न चाहन्छु। आज तपाईंहरू केवल एउटा परीक्षा पास गर्नुभएको छैन, जीवनको एउटा महत्वपूर्ण मोड पार गर्नुभएको छ – जहाँबाट तपाईंहरूको भविष्यका अनेक अवसरहरूको ढोका खुल्दैछ।
कक्षा १२ सम्मको शिक्षाले तपाईंहरूलाई ज्ञान, अनुशासन, र सोच्ने शैली दिएको छ। अब समय आएको छ त्यो सिकाइलाई व्यवहारमा उतार्ने, आफूलाई अझ चिन्ने, र समाज तथा राष्ट्रका लागि योगदान दिने संकल्प गर्ने। तपाईंहरू अब केवल विद्यार्थी मात्र होइन, राष्ट्र निर्माणका सम्भावित कर्णधार पनि बन्नुभएको छ। यो जिम्मेवारीलाई गम्भीरताका साथ आत्मसात् गर्न आवश्यक छ।
युवाहरू कुनै पनि राष्ट्रको मेरुदण्ड हुन्। तपाईंहरूको विचार, सोच, र कर्मले नै देशको दिशा निर्धारण गर्नेछ। आजको दिनमा तपाईंहरू जुन निर्णय लिनुहुन्छ—कुन विषय रोज्ने, कुन मार्ग अपनाउने, कसरी अगाडि बढ्ने—त्यो केवल तपाईंको व्यक्तिगत भविष्यको कुरा मात्र होइन, तपाईंको निर्णय सँगै राष्ट्रको पनि भविष्य जोडिएको हुन्छ।
तपाईँहरू राष्ट्रपति उत्तरदायी र देशभक्ति हुन जरुरी छ। अहिले देशप्रतिको चिन्ता राष्ट्रभक्ति भावना कम भइरहेको अवस्था छ।
विदेशिने र आफ्नो मात्री भूमिलाई बिर्सने युवा पंक्तिमा गम्भीर समस्या पैदा भएको छ। यो विषयमा तपाईँहरू सचेत र गम्भीर हुन आवश्यक छ।
राष्ट्रप्रति उत्तरदायी हुनु केवल कर तिर्नु वा कानुन पालन गर्नु मात्र होइन। राष्ट्रप्रति उत्तरदायी हुनु भनेको—सामाजिक सद्भाव कायम गर्नु, ईमानदारीपूर्वक अध्ययन तथा काम गर्नु, गरिब, असहाय र पिछडिएका वर्गप्रति संवेदनशील हुनु, र हरेक कार्यमा सकारात्मक सोच राख्नु हो। तपाईंहरूको सीप, ज्ञान र शक्ति राष्ट्रको सेवामा लगाउनु नै साँचो देशभक्ति हो।
प्रविधिको युगमा तपाईंहरूलाई विश्वस्तरीय ज्ञान र अवसरहरूको ढोका खुला छ। तर, त्यही प्रविधिको प्रयोगले समाजमा भ्रम फैलाउने, घृणा बढाउने वा नकारात्मक प्रभाव पार्ने काम नगर्नुहोस्। आफू सचेत हुनुहोस्, अरूलाई पनि सही बाटोमा डोर्याउनुहोस्।
साथै, यो समय प्रतिस्पर्धाको हो, तर आत्ममूल्याङ्कन र सहकार्यको पनि हो। सफलता प्राप्त गर्ने हतारमा मूल्य र नैतिकता नबिर्सनुहोस्। असफलता आएमा निराश नहुनुहोस्—किनभने असफलता पनि भविष्यको तयारीको एउटा पाटो हो। संघर्ष नै सफलता प्राप्त गर्ने एउटै मार्ग हो भन्ने कुरा कहिल्यै भुल्नुभएन।
अन्त्यमा, तपाईंहरू सबैले जुनसुकै पेसा रोज्नुहोस्—चिकित्सक, इञ्जिनियर, शिक्षक, उद्यमी, कलाकार वा समाजसेवी—त्यो पेसामार्फत राष्ट्रको सेवा गर्ने भावना सधैं जीवित राख्नुहोस्। तपाईंहरूबाट देश, समाज र परिवारले धेरै अपेक्षा राखेका छन्। ती अपेक्षाहरू पूरा गर्न तपाईंहरूको निष्ठा, कर्तव्यपरायणता र निरन्तर प्रयत्न नै काँचुली फेरिएको नयाँ नेपालको आधार बन्न सक्छ।
पुनः एक पटक—हार्दिक बधाई तथा उज्ज्वल भविष्यको शुभकामना!
तपाईंहरूको यात्रा सफल, समृद्ध र प्रेरणादायी होस्। ( लेखक पाेखरेल नेकपा माओबादी केन्द्र नगर कमिटी कटारीका सचिव समेत हुनुहुन्छ – सम्पादक )
प्रतिक्रिया